Sahawisó:ko’ Arquette tehowennanetáhkwen. This page has been translated by Sahawisó:ko’ Arquette. The English version is available to read below.
Ionkwara'sè:se' aiakhiia'takéhnha' nonkwentióhkwa' tsi kanatakwé:kon ionkwahkwísron aonsetewaié:na' ónhka nì:'i. Tánon' ne aonsetewakwatá:ko' tsi takahwatsiratátie' tsi ní:ioht tsi ionkwakaronnià:ton ne ratihnarà:ken ionkhiionhontsáhkhwen. Kwah sénha tsi é:ren ionkwéhton tsi nitewawennò:ten tánon' ne tsi niionkwarihò:ten. Wate'nikonhrón:ni ne aiakwaten'nikòn:raren' tánon' ne aiakwanónhstate' ne Kanien'kehá:ka tsi nitewawennò:ten, tsi niionkwarihò:ten, tánon' ne taiakwatatahrhò:ton' nonkwentióhkwakon. Né: ki' entewate'nienténhston tsi ní:tsi ionkwarihwíson' teniakwarihwáhsnie'ne' ne sénha aiòn:ronke' tánon' ne sénha aiako'nikonhraién:ta'ne' ne tsi niionkwarihò:ten.
Tsi ka'nónhkwaien' nonkwentióhkwa' kaientáhkwen naiakwatste'niá:ron' aiakwaterien'tatshén:ri' orì:wase's tánon' ia'taiakwarì:waiehste' tsi niionkwarihò:ten. Tsi náhe' shiionkwanitiohkón:ni ne Tsi Niionkwarihò:ten Raotitióhkwa' eh tho náhe' shiionkwahrharátston taiakwá:iehste' onkwaio'ténhsera' tánon' onkwahsótshera' tsi nihoti'nikonhrò:ten. Onkwentióhkwakon taiakwatáhsawen' wa'akwaterihwahténtia'te' kí:ken. Ó:nen ki' nòn:wa teionkwaienawà:kon tsi ionkwarihwaio'tátie' naietewaié:na' tánon' aietewanónhstate' Kanien'kehá:ka tsi nitewaweiennò:ten.
Tsi Niionkwarihò:ten Raotitióhkwa' tehshakonatka'wén:ni ne shakotiia'takéhnhas rotiió'te' tánon' kanakerahserakonhró:non nia'té:kon ahontéweienste' tánon' ahonata'karí:teke'. Kanakerahserakonhró:non tionkwatenróhon aiakwaterihwahténtia'te' kí:ken naho'tèn:shon.
Nok ò:ni', tionkwa'nikonhrakontáhkwen taiakwarihwáhsnie'ne' ne sénha taiakwarihwaié:na' nonhóntsa'. Onhontsà:ke enionkwaió'ten' tánon' tsi niionkwarihò:ten eniakwaterihwahténtia'te' néne ionkhiio'ténhse' tánon' iakhirihwawà:se' roatirihwà:ke.
Onkwentióhkwa' tewate'nienténhston nahò:ten' tionkwehtáhkwen. Nia'té:kon nahò:ten' tiakwatkà:was, wateweienstáhkwen, atenonhweratónhtshera', tsi niionkwarihò:ten, nok aiakhirihónnien'. Ieionkwáthre' taiakhi'nikonhrakà:ronhste' akwé:kon tsi niiá:kon teiakwatátkens. Shé:kon enioken'tónhake' nahò:ten' ionkwate'nikonhríson' nó:nen ia'teniakwatkà:neren' ne ohén:ton iohawíhton. Iakwahská:neks aiakhihretsá:ron' ne ionkhiio'ténhse' ia'tahatirì:waiehste' tsi niionkwarihò:ten tánon' tsi nahò:ten' rotiió'te'. Né: ki' enkarihwahní:rate' tsi enkarihwatátieke' tsi niionkwarihò:ten. Ken' nikaio'tenhserò:ten ióhsere' ne Shakotiia'takéhnhas nahò:ten' ronate'nikonhrón:ni, nok ò:ni' tsi ní:tsi onkwanakeráhsera' ionkwate'nikonhrón:ni aionkwata'karí:teke'. Tánon' kwah ohén:ton í:kate' ne tsi niionkwarihò:ten tánon' Kanien'kéha.
Ronatiohkowá:nen onkwehshòn:'a kari'wanóntha' ne aionkhiió'ténhse' ne onkwanakerahserá:kon. Ó:ia' kanatakonhró:non tánon' ronaterihwahtentià:ton skáthne ionkwaió'te' ne taiakwáhsnie'ne' tánon' aiakwanónhstate' ne tsi niionkwarihò:ten tánon' tsi nitewawennò:ten. Skáthne tentewatenonhwerá:ton' tánon' tentewarénhsaron' tsi niiohskáts, tsi niio'nikonhrowá:nen, tánon' tsi niiorihwahní:ron ne Kanien'kehá:ka tsi nitewawennò:ten tánon' ne tsi niionkwarihò:ten. Né:ne òn:wa ken' wenhniserá:te' tánon' ne tsá:ta na'tekahwatsirà:sere' raotirihwà:ke.